尋晚美股急跌，前日買咗既貨有一半已經獲利，不過淨番果一半相信星期一都會變成蟹貨，心情當然唔好受啦，因為數量都唔少 ga，希望唔好繼續跌落去啦，因為我唔想愈踩愈深呀 

有時都覺得自己幾黑仔 ga，平時買少少佢就升多多，今次買多多佢就跌多多，唔通我真係唔適合玩股票 ?!  攪到尋晚都冇咩心情同囡囡傾揀酒店既嘢，希望囡囡唔會介意啦 

尋日生意一般，俾我有時間讀吓書，咁就好喇，仲有一個月多ｄ就考試喇，希望可以勁過啦．．．今個月份糧一出就差唔多會冇晒喇，因為要還卡數，當中囡囡果對鑽石戒指係最多，而之後果兩個月都冇得儲錢，因為要交稅同 MPS，要真正有得儲錢就要等到明年一月出糧喇 

依幾日生意回穩番少少，俾我有時間響診所溫吓書，當然夜晚仍然有去跑步啦，仲跑咗 12 圈添，希望短時間內再減多 6 磅就好喇，我以後會小心飲食，唔會再俾自己肥落去 ga la 

囡囡宜家收集緊酒店資料，希望可以 book 定 2011 既婚宴場地，因為我地又唔係請好多人黎飲宴，而半島就有一個幾豪華既 ballroom，最多可以擺 10-12 圍，都唔平 ga，要超過一萬蚊一圍，不過我地都會再睇多幾間先決定響邊間酒店擺酒既，希望到時攪得好好睇睇啦 

後日就同屋企人去食海鮮喇，餐單已經準備好晒 ga la，希望到時大家食個飽啦，非常期待星期日既來臨 ~~ 

尋日終於都係冇跑步呀，因為對腳太攰喇，休息咗一晚，對腳真係冇咁攰喇，今晚又可以再戰江湖，令我既體重進一步下降，YEAH ~~ 

囡囡想響半島擺酒，好高級 ga wor，不過果度只可以擺 10-12 圍，希望夠位擺啦，如果係咁都可以考慮一吓，同埋搵一日同囡囡去現場觀察一吓個景先得，囡囡心情好好囉，因為希望重燃喎 

今朝對腳真係好攰，可能依兩日跑步跑得太勁，好似尋晚咁一開始跑咗未有一個圈已經感覺到對腳好重，不過我都好努力呀，堅持跑咗 10 圈先停，今晚睇黎都係休息一吓好ｄ喇 

囡囡好鍾意響酒店擺酒喎，佢話好豪好靚喎，哈哈．．．如果佢真係咁鍾意既話，雖然圍數唔多，我都會響酒店擺呀，因為囡囡開心先係最緊要囉 

放咗兩日大假，心情輕鬆，星期日同囡囡出去攞鑽石戒指，真係好靚呀，再去睇酒店場地，靚就靚喇，不過有最低消費囉，我估一ｄ都唔平 ga，如果圍數唔夠，就唯有擺酒樓喇，因為酒店真係要 1 萬蚊一圍 ga，真係幾豪華呀 

依兩日叫咗三次外賣，同囡囡響渡假屋食飯，唔駛走落街食都幾爽喎，不過味道就一般，但係又唔想囡囡煮喎，叫一兩次外賣都唔緊要既，餐餐食就唔好喇 

尋日放假響渡假屋 hea，中午父母親大人攞咗部吸塵機黎俾我，因為舊果部發出一ｄ臭味，試玩完吸塵機就一齊嘆吓電視，跟住就落街食鷄鷄，再之後我又上返去瞓覺，咁既生活都幾寫意喎 

尋日都有去跑步呀，跑咗 16 x 400 = 6400 米，再練好少少就真係可以跑半馬拉松，仲有一樣最開心既事係我已經減咗八磅喇，成績真係好好呀 

好攰呀，尋晚空氣好差，跑得好辛苦，好似唔夠氧氣咁，不過最終都堅持自己，跑完 13 圈，即 5200 米，好辛苦呀，希望我既努力唔會白費啦，再減多七磅就可以回復當年做學生果時既體重喇，嘩 ~~ 原來我出咗黎做嘢就重咗 14 磅，果時晚晚響醫院食好嘢，又唔做運動又唔戒口，增磅容易減磅難呀，未來想減果 7 磅亦都係最難減 ga la，可能真係要下年先有機會達標囉 

聽日同囡囡一齊出去攞鑽石戒指，一定好好啦，唔知囡囡心情係唔係同果粒鑽石一樣笑得非常燦爛呢 ?!  我就唔係好心急呀，不過佢就成日問我果個人有冇打俾我，又問我佢地會唔會整唔見我地果粒石喎．．．

今晚可能早ｄ上渡假屋休息，朝早叫個外賣靚靚早晨食，一邊睇卡通片，一邊嘆早餐，再響飛機梳化椅上休息一吓，真係人生一大享受呀 

尋日診所部電腦終於可以 print 病假紙同收據喇，真係幾方便，咁就唔駛寫嘢寫到手都軟啦，不過代診個 account 就仲未試位，希望都係一樣 ok 啦 

尋晚慢跑咗十二個大圈，即係大約 5400 米，出咗好多汗呀，都有ｄ攰，總共跑咗三個月有多喇，減咗 7 磅，目標係再減多 7 磅，今朝已經將皮帶扣緊咗一格，肚腩都真係細咗，不過遲ｄ如果要做 locum 既話就唔可以 keep 得好 fit 囉，一來冇時間跑，二來出街食埋ｄ油膩嘢，一ｄ都唔健康囉 

同囡囡揀緊酒店擺酒，暫時決定響旺角地標酒店擺囉，一來方便易去，二來無人不識，三來價錢都合理，希望到時有一個難忘既婚宴啦 

尋日劉太又打落黎喇，又話咩咩 locum 俾唔到咁多錢我，咁我做黎仲咩鬼呢 ?!  早ｄ返屋企休息吓仲好啦；第二係話個合約個 percentage 又唔可以加到咁多，咁我又問仲咩要簽過份約囉 ?!  最後咩都唔攪，合約照舊，locum 有番我話咁多先做．．．總之攪到好"興"囉 

尋日同阿瑩去 Pixza Hxt 食嘢，咁o岩牙醫又打黎搵佢喎，咁順便就叫埋佢黎食喇，二人餐再送一個餐，三個人食就o岩o岩好喇，如果唔係就要打包 ga la，海鮮批冇至尊批咁好食囉，錢唔係一個問題，最大問題係尋日冇得瞓覺，下午變得好攰囉，仲要攪到冇得跑步，咁一定俾母親大人減得快過我啦 

囡囡尋晚提議第日返大陸影結婚相，我就冇所謂呀，最怕係危險姐，聽囡囡講話質素都幾好添，仲要俾香港多好多相，價錢都係好抵，都可以考慮一吓，等下個月睇咗婚禮展覽先決定 booking 啦 

尋日收到個消息，劉太想同我簽過份合約，我順便提出想做吓 locum，出糧出現金，一個月就多好多錢喇．．．宜家劉太好缺醫生，我想加人工都可以既，不過唔好喇，費事大家難做，加得又唔係多，不如自己努力做多幾份 locum 仲好啦 

囡囡尋日同同事放咗工去 BBQ，好似好好玩喎，食咗好多好嘢，佢就好啦，唔知幾時可以同囡囡又玩吓 BBQ 呢 ?! 

今日好忙呀，又要打針，又要睇症；下午 lunch 又約咗姑娘食 Pizza，希望唔會咁快肥啦，尋日磅重減咗好多呀，總共減咗 6.5 磅，唔算減得好快，不過都算好成功呀，一日跑成 5 公里喎，你估人人都咁有恆心咩 ?!  希望第日做 locum 都有時間跑步就好喇 

尋日開始幫小朋友同長者打流感針喇，不過唔係太多人打 ja wor，我自己都唔係想太多人打囉，因為營業額會被拉低，希望睇多幾個症仲好啦，因為有錢收呀嘛 

尋日跑咗 12 個圈，跑到攰晒，打算食麥當當買一送一既嘢食 ga，點知優惠只係去到 6 點，咁仲好啦，當減肥，雖然宜家減磅慢咗好多，不過我仍然堅持會繼續跑步，身體都好ｄ啦 

囡囡依幾日起身話好多胃氣喎，不過一陣之後就冇咩嘢喇，可能依排太辛苦掛 ?!  又要返工，又要上堂，又要掛住我同粒鑽石，咁真係冇辦法 ga wor，都係掛少ｄ同食吓胃藥咁囉，希望幫到佢啦