尋日同囡囡過咗開心既一日，同佢第一次飲台式珍珠奶茶，買咗一對懶惰熊沖涼毛巾，仲攞埋我副眼鏡添，囡囡都有禮物 ga，其實最緊要大家開心，洗少少錢又有咩所謂呢 ?! 

約囡囡出街之前同屋人飲茶茶，叫咗好多嘢食呀，仲要攞埋今朝早既早餐添，真係好抵呀，下次囡囡黎都要同佢一齊飲茶開心吓先得 

行完街之後上咗囡囡屋企食晚飯，佢有親戚黎喎，大家臨開飯之前玩 21 點，頭頭輸成 $8 ga，最後一舖用 $10 玩，羸咗之後倒賺 $2，哈哈．．．真係好好彩呀 

今朝早上熱得好緊要，架車又遲咗黎，足足流汗流足 5 分鐘，仲要咁o岩個靚位俾人坐咗，總之就係出師不利啦，仲有本人好憎出汗同熱既感覺，心情會變得好差囉，宜家坐定定嘆冷氣就冇咩事喇 

囡囡下個星期五就開始上堂學新娘化妝喇，一個星期兩堂，希望佢快ｄ學識搵多ｄ錢啦，囡囡都算幾好學喎，讀完碩士又想讀博士，宜家仲要去學其他嘢，同我相比成日話要讀 Law，不過我就只得一個講字，真係要讀都讀咗ｄ醫學文憑先啦，搵食緊要吖嘛 

渡假屋已經安裝咗智能冷氣系統喇，只要打一個電話就可以令屋企部冷氣自動開啟，尤其是宜家天氣咁熱，上渡假屋之前 15-20 分鐘開定冷氣都好喎，至少上到去唔駛咁熱吖 ~~ 

尋日有個 4 歲女仔 febrile convulsion (發燒抽筋)，佢前日已經發燒 ga la，之前仲有 febrile con 既病歷，點知尋日先黎睇醫生，仲要響屋企唔俾定ｄ退燒藥佢食，黎到我果度量到華氏 103.1，檢查完準備開藥俾佢果時，囡囡突然抽筋，佢媽咪好緊張呀，成日問我點算好，話佢真係好驚，我叫佢冷靜ｄ，瞓側小朋友響床上面，等佢ｄ口水同分泌物流出，計時抽咗幾耐筋，保持呼吸道暢通同空氣流通，聽吓佢既心跳同呼吸次數等等，最緊要當然係打咗電話報警先啦．．．救護員好快就黎到，佢地簡單聽咗我講女孩既情況之後，然後將佢送院處理，前後都係 20 分鐘之內，效率都相當好 ga la 

尋日跑步有新突破，俾我響 20 分鐘之內一口氣完成 3000 米，即運動場 7 圈半，亦係中學時代最長既長跑距離，以前就驚 3000 米賽事，原來宜家體能上都可以達到，依個就係我響大半個月練習返黎既成果喇，諗起都好興奮呀 

今朝母親大人會出去尖沙咀攞藥，我既午餐就要食飯盒喇，今日好想食切鷄燒肉飯喎，諗起都流口水呀，食完再瞓番一覺就真係好爽呀 

囡囡依幾日好攰喎，係唔係作感冒呀 ?!  要小心身體先得呀，如果唔係後日星期日就要留響家中休息，冇得同我出街玩 ga la 

尋晚好開心呀，因為我終於換咗部新既手提電話喇，係轉台果時用優惠價買 ga，功能上大致上都差唔多，不過就冇晒我之前舊電話既問題，不過影相功能就差過之前果部，但係我又唔係好介意喎，因為我已經有一部好好既 DC 用黎影相囉 

尋晚做到好夜先收工，攪到跑唔到步，希望今晚可以繼續番啦，尋日都唔知點解臨收工果時不停有病人入黎，放工時間到咗果時都有四個病症未睇，返到屋企足足遲咗半個鐘呀，心情就一定唔係咁好 ga la，不過一見到部新手提電話同新太陽眼鏡就精神晒，所以物質上既享受都係有一定用處呀 

囡囡牙仔痛喎，星期六約咗牙醫睇牙仔同補牙，佢話一食甜嘢就痛喎，可能佢刷牙有ｄ位刷唔到呀，用電動牙刷就可以解決依一個問題啦，我初時都唔知用電動牙刷係咁方便 ga，宜家用過之後就知道好用喇，希望渡假屋都有一支啦 

高佬 Dick 開舖做生意喇喎，佢唔係開診所，而係開一間台式飲品店，當係一門投資都幾好 ga，不過我就唔熟唔食喇，一定要開一ｄ自己比較熟識既嘢先好搞囉，例如醫務所同藥房，希望第日有一番作為啦 

話咁快就星期三喇，仲要係今個月已經 26 號喇，即係就快出糧呀，心情十分興奮，其他咁開心仲有兩個原因，一來有一ｄ極度麻煩既事情終於解決咗，成個人放心晒；二來尋晚練跑成績都唔錯，可以一口氣跑完 6 個圈，即係 2400 米，我發現每經過一次辛苦既練習，跑步既耐力都會得到提升，回想番讀中學果時既陸運會，一聽到有人話要跑 3000 米就嚇到呆咗，覺得佢地好勁囉，其實果時都有參加過一次 ga，不過跑咗兩個圈就冇再跑喇，加上自細既體能都係麻麻地，希望宜家練跑可以俾我連續完成 3000 米，之後就會再練時間，一定可以操 fit 自己 ga 

囡囡尋晚好攰喎，打俾佢果時已經瞓咗，勉強同我傾咗一陣之後就繼續瞓喇，唔知佢有冇刷牙先瞓呢 ?! 

我有預感 9 月股市會有大調整，開始減持貨物，獲緊部分利潤，放就一定唔會放晒，依個係玩心理戰既技巧，亦係經驗帶來既技巧 

近排想買個眼鏡袋入住我副太陽眼鏡出街喎，問過好多間商舖都冇得賣，我諗最後都要去番配眼鏡果間嘢到問佢攞眼鏡袋先得喇 

囡囡依排煩緊讀化妝課程既嘢，九月就開始喎，讀兩個月，一共十六堂，每堂三個幾鐘，希望佢唔會太辛苦啦，學識咗就可以賺錢錢喇，我都幾支持佢接 job 做 ga，搵吓外快咁，希望佢可以做到心目中既新娘化妝師啦 

尋晚都有去跑步喎，宜家可以連續跑四個圈喇，休息一陣之後又可以再跑多兩個圈，如果唔可以日日練跑，至少都隔日練啦，咁過多一兩個月希望可以見到成效啦 

尋日一朝早起身出旺角攞太陽眼鏡，點知出到去果間眼鏡舖仲未開，跟住就響附近既"大X樂"食個靚靚早餐．．．攞咗眼鏡之後就搭車到沙田上堂，睇吓佢份 notes 咁囉，發現份 notes 超廢，都係早ｄ走約囡囡行吓街仲好啦，順便試吓副型超添 

同囡囡行銅鑼灣，天氣真係好熱呀，囡囡條腰都濕晒喇，我當然係不停流汗添啦，行到 "宜X"傢俬入面當然坐吓又休息一吓，跟住就返香港仔同囡囡一家人食飯喇．．．尋晚果餐有一條免費大石班食呀，再叫一ｄ小菜，四個人食都係 $300 ja wor，都算幾抵，依一餐係我請佢地一家人食 ga，希望大家都食得開開心心啦 

父親大人幫我整咗個通渠用既 guide wire + brush，希望一陣少ｄ病人果時用黎試吓得唔得啦，不過我對今次通渠好有信心，等我聽日報喜啦 

尋日試過用一個拆開咗既衣架黎通渠，結果當然係失敗收場，今日會嘗試用父親大人響佢公司整俾我既 guide wire 黎通渠，希望可以成功啦，果條 guide wire 有得輕易扭曲成唔同形狀，如果連佢都通唔到就真係冇晒辦法喇 

囡囡今晚同屋企人去酒樓食飯喎，話有一張 coupon 可以免費食到一條大石班，如果我唔駛返工都會去食喎，下次啦，一定有機會食好嘢既 ~~ 

囡囡今日都要返工，不過好彩返上午姐，下午都可以返屋企放假休息．．．而我就心情緊張喇，因為聽日就可以攞到副太陽眼鏡呀，會唔會即刻變咗個型仔呢 ?!  不過聽日要上完堂先可以去攞鏡呀，而聽日既堂都係廢廢地，早ｄ走人都係一個唔錯既決定 

頭先同阿瀅姑娘食腸粉早餐，$10 一位又真係幾抵喎，好耐都冇食腸粉喇，好好味呀，不過唔可以成日食囉，因為依排要減肥做運動呀，下次有機會再食過 

尋日診所水浸事件波及隔離診所，臨收工果時診所地面出現一ｄ水漬，初時都好驚呀，以為又再次水浸，不過好彩冇咩事，今朝一早帶埋工具自己嘗試通渠，當然唔成功啦，做醫生就得姐，通渠依ｄ嘢都係要搵人黎整 ga la，希望阿太快ｄ搵人攪掂佢啦 

囡囡尋日同一個做醫院化驗既朋友仔食晚飯，傾得好開心咁喎，而囡囡依排亦都想讀一ｄ關於化妝既課程，費用都要成 $10,000，不過學成之後就可以接 job 做，人工都好好喎，希望佢可以一切順利啦 

尋日都有去跑步喎，拉咗筋真係唔會抽筋喎，不過跑咗三個圈都已經好辛苦呀，我諗我要繼續努力練跑先得，目標係可以跑完 3000 米，同埋體重可以減 10 lbs，今晚再去練跑先得 

今朝一返到診所又水浸喇，條渠真係通唔到喎，咁冇辦法啦，診所唯有唔用水住啦，星期日果個代診醫生仲要係麻煩友黎添喎，上次水浸佢仲要開到個水喉大一大，今個星期冇水洗手睇吓佢點樣算，其實個水喉對我黎講作用不大，因為我平時都係用酒精液消毒雙手，不過有水始終好過冇水用既，希望公司快ｄ搵人整番好條渠啦 

囡囡屋企尋日收到房署既信，話佢地冇報到佢地 Daddy 份工，初時仲虛驚一場，以為要交倍半租金，最後都唔駛驚，因為就算報埋佢 Daddy 份工，再加埋第時妹妹出黎做嘢有一萬蚊收入都好，都仲未過額．．．真係好好彩呀 

眼鏡舖又打黎喇，話我副太陽眼鏡造好咗喇，希望今次真係 ok 啦，上個星期副太陽眼鏡個鏡片顏色唔係漸變黑色，佢都承認咗錯誤既，我對佢地都仲有信心呀，如果今次副太陽眼鏡造得好既話，我會俾佢造多副平時帶既眼鏡，事關囡囡俾咗兩個名牌眼鏡框俾我囉，原本都諗住配過副眼鏡 ga la，宜家有埋個靚框仲好添 

今日對腳仲有少少攰，應該今晚都唔跑住 ga la，聽日對腳應該可以完全恢復體力，到時先再練跑啦