依排響診所好焗呀，因為冇得開冷氣，帶埋個口罩黎睇症真係好辛苦，所以每睇完一個症都必定立即除咗個口罩，其實空氣唔流通真係好易生病 ga，而診所既診症室又係密封既環境，細菌真係好容易散播呀，真係要小心身體先得喇 

下星期一係美國各大銀行壓力測試公佈結果既日期，好似話數據唔係咁好，豬流感既疫情影響之下，美股尋晚不跌反升，真係出乎意料之外，我對後市信心不大，現金響手係最緊要，宜家都係睇吓美國依場大戲仲好啦，費事日日浪費時間睇埋ｄ股票呀 ~~ 

依幾日 download 咗好多英文歌，終於有時間試聽喇，其中有一套名為 "Lxxe 101" 6 CD 既英文大碟，當然入面有成 101 隻歌，點知俾我揀淨得番 15 隻係好聽喎，之前買果ｄ英文碟都係差唔多，一隻有 20 隻英文歌既碟入面，得兩三隻係可以成為我既收藏集，現時收藏集有大概百多隻歌，全部都係一等一既好歌，真係百聽不厭 

星期六下午放假半日，可以去行街同狂歡喇，錢就搵唔晒既，最緊要做人開開心心，有假就放，可能會約囡囡出街玩 ga，不過可能佢未必得閑，因為要教妹妹嘢同準備會考呀 

豬流感疫情似乎有惡化，已經攞咗屋企存放多時既 N95 口罩返診所，同埋響依幾日內購買傳染病房用既面罩 (face shield)，因為我地係高危人仕，希望疫症唔好響香港出現啦 

下載英文歌既計劃正進行得如火如荼，又真係估唔到診所下載得幾快喎，單單係尋日已經下載咗幾隻碟，不過都仲未有時間去試聽呀，有ｄ歌曲未必係我熟識既，通常我都會 delete 咗去，事關我部電腦既硬碟唔係咁大，再加上所有歌曲已經佔咗成個硬碟既七成，哈哈，所以我成日話我係可以做 DJ，幫人現場點唱囉 

囡囡依排都冇咩特別事情發生，工作都幾順利喎 ~~ 

美國豬流感爆發，不過我估冇幾耐香港一樣會有，都唔好話冇咩殺傷力呀，外國加埋晒都有百幾二百人死咗 ga la，經濟可能會進一步下滑，雖然宜家出街都仲未要帶口罩，不過遲ｄ一定有咁既需要囉，令我諗番起當年沙士疫情，希望唔好發展到咁既地步啦 

Download 英文歌正在如火如荼，尋晚響屋企搵番好多英文碟，全部都係我響中學時代購買既，當年著住校服，攞住獎學金買碟既畫面響我腦海一一湧現，原來當年我仲買咗幾隻學普通話既光碟添，真係好好喎，希望第日真係有用得著既時候啦 

囡囡尋日請師姊們響香港仔食越南嘢，話好好味喎，希望下次有機會我都要食吓呀，當年響瑪麗醫院實習其間，日日中午都係食越南嘢，諗番起都成兩年幾三年前喇，時間真係過得好快好快呀 ~~ 

尋日同囡囡響銅鑼灣食韓國燒烤，雖然之前發生咗少少不愉快事件，不過最後都係可以和好如初既，響唔開心期間，自己一個人行街，買咗一幅有近視度數既泳鏡同埋一本教人煲老火湯既書，囡囡都有一份禮物 ga，就係一把 UxxLx 既傘子，希望大家之後可以開開心心啦 

講番食韓燒既情況先．．．味道幾好，嘢食種類都好多，任飲任食真係幾過癮呀，佢話七點半之前埋單會有優惠，所以如果六點鐘去到食既話，一來有個半鐘任食之餘，二來又有特別優惠，尋日埋單都唔係太過貴既，不過得一個鐘食嘢就好似急咗少少囉，其實全日我又唔係食咗好多嘢喎，最後食咗一大碗飯同狂食生果，始終食太多肉類唔係咁好啦 

尋日做咗一件好開心既事呀，就係 download 番好多英文歌去我部電腦呀，果時淨係燒咗碟，冇 mp3 格式，宜家終於有晒喇，果個網站真係好人喇 

最憎天雨濕濕既天氣，攪到個人都冇咩心情咁．．．囡囡今日好早返到港大喎，因為佢妹妹今日要到附近既一間學校考會考，囡囡就順便搭的士車埋佢喇，所以咪早咗返工囉，一定會好攰喇，不過佢今日星期六只係返半晏，一陣仲可以返屋企休息一吓，都幾寫意呀 

依排診所都少番ｄ病人喎，響診所都係玩吓 "pet soxxety" 咁囉，有時就睇吓財經，又或者睇吓戲咁呀，都幾舒服同得閑喎，不過如果可以多番少少人仲好，時間會快過ｄ呀嘛．．．o岩o岩尋日電視做完咗一套關於桌球既劇，其實都真係幾無聊喎，劇情一般，唔會有想追看既吸引力，所以我都係時睇時唔睇，不過之前果套 "XX大老爺" 就幾好睇喇，可惜我放工返去睇果時已經做咗一半啦，至少個劇情都幾好，希望之後都唔好令我失望啦   

今晚睇吓有冇心情做運動同埋去渡假屋啦，上到去又要清潔一番先可以瞓覺，不過就有自己既私人空間囉，同埋感覺會好 free 呀，成個人都會變得好 relax，不過如果太攰都未必上去 ga la 

今日原本要去果個醫學會 lunch meeting，不過身體有少少唔舒服，所以都係打電話俾寫字樓話唔去喇，早ｄ返屋企休息一吓仲好啦 

尋晚放工買咗少少 KxC 返屋企食，之後仲響超市買咗兩盒喉糖添，價錢同響香港仔既一間藥房差唔多，其實我又唔係成日食既，都係有時開工喉嚨有ｄ沙先食姐，因為食得多都唔係一件好事囉 

囡囡尋晚瞓得唔係咁好，可能佢聽完鬼故掛，都叫咗佢臨瞓之前唔好聽一ｄ咁刺激既嘢啦，希望佢今晚可以瞓得好少少啦，不過囡囡今個星期六好似要返半日，聽講佢之後都會忙番一ｄ，唔會好似宜家咁 hea 喎，但係點忙點辛苦都唔會好似響科大咁既，努力工作仲好啦 

尋日幫舅父同舅母睇症，佢地大致上都冇咩大問題，食ｄ藥就冇事 ga la 

依排個市有ｄ回落，真係唔知係牛一回穩定係熊三，真係要留意一吓先得 

依排心情都只係一般，只想每日有多ｄ時間休息 

一陣下午大舅父同舅母會入黎睇醫生喎，一來幫佢地睇吓份報告，二來舅母有少少背痛，我諗都係天氣潮濕所致姐，食吓藥就冇事 ga la 

尋日響屋企睇泰拳比賽，作為練武之人一定要睇啦，真係好緊張好精彩，BoBo 狗仔響我隔離都唔係好安全呀，一下唔小心整痛佢就唔好意思啦，通常我睇電視果時都會坐響梳化上面，BoBo 就會爬過黎，坐響我大肶上面，我就會捉住佢幫佢掃毛，有時佢會舒服到瞓著咗覺 ga，係唔係好得意呢 ?! 

尋日諗起囡囡果日煮嘢食唔係好夠高，不如叫父親大人整個木台仔啦，不過父親大人話驚跌親佢喎，不過點都好，我估佢會整既，最多唔用果時放埋一二邊囉 

尋日放工出咗旺角行街，好開心呀，行到攰晒就返屋企食飯，心情尋日都幾好喎，所以先有行街既衝動，雖然雙腳係有ｄ攰，不過都係當一種運動，遲ｄ可能會試吓放咗工之後去跑步，希望身體會再健康一ｄ啦 

諗緊母親節有咩禮物送俾母親大人添，o岩o岩恆生信用卡寄咗一ｄ母親節既特別優惠，一睇之下，一個母親節蛋糕係少不了 ga la，仲有八折優惠添，有時間買番個黎同母親慶祝一吓都好喎，當然仲會同佢食番一餐好 ga la ~~ 

囡囡個妹妹尋日考完第一科喇 --- 物理科，佢話好難喎，不過難有難既好處，因為最後妳個 grade 會高一ｄ，不過對一ｄ勁人黎講就未必係一件好事，當然對一ｄ勁勁勁人黎講就冇咩影響啦，點都好，我 A-level physics 都係咁而攞到一個好成績呀 

近排天氣真係好潮濕呀，攪到個人都唔係好自然，不過由於尋晚都瞓得幾好，今朝都幾精神，冇咩攰既感覺呀 ．．．得閑果時仲會玩吓 pet socxxty 添，都幾好喎 

星期六放工食完飯之後，過咗渡假屋休息，清潔一吓地方之後，就一邊睇電視一邊聽英文歌喇，原本 download 開英文歌既免費網站突然間唔俾再 download 喎，真係好失望囉，話說發現有一兩隻歌播放唔到，仲想話上網 download 番黎聽添，似乎大陸果邊都幾有恆心去打擊翻版喎，宜家只有攞番ｄ舊 CD 出黎，將佢轉換成 mp3 format 啦，我有好多老翻英文歌 CD ga，大部份都係響中學期間購買呀，仲記得有一次攞咗學校既獎學金之後，著住校服同埋用ｄ獎學金去買老翻碟，可想而知我對果ｄ懷舊英文歌係有幾熱愛喇 

尋日星期日一早起身，落街食咗個 "吉X家" 牛肉飯，再加一杯汽水，食到好飽呀，之後再行吓街，囡囡就已經到喇，同囡囡響超市買咗一ｄ食物準備整晚餐食，而佢既午餐就係一個 "波X" 丁丁飯，我一向都少食丁丁飯既，不過味道都可以接受，唔怪得佢愈黎愈多人買啦 

晚餐囡囡整米線俾我食，廚房新整果度推門真係幾好用，兩個人一齊煮飯仔都唔會覺得好迫，我諗三個人一齊煮飯都冇咩問題既，我有幫手煮 ga，不過煎到ｄ鷄翼有少少燶，希望下次唔會咁啦