婆婆離開咗我地都已經有一年喇，今日父母親大人會上山去拜婆婆，我自己都好掛住婆婆 ga，因為細細個果時婆婆對我地好好，雖然依一刻自己都好唔捨得婆婆，但係再想一層，婆婆離開我地果時都幾安祥，年紀大喇，離去都係無可避免，只要人生在世時好好咁對佢，而佢自己亦都生活得精彩，我覺得都唔需要太傷心呀，希望婆婆響另一個世界生活得愉快，好好咁保祐我地的子孫啦 ．．．

依幾日開始睇返以前的雜誌，都好好睇喎，可以知道當時有ｄ咩大事發生啦，例如果時雜誌叫人買股票，因為話一定升得好勁，宜家睇返當然覺得幾好笑，再加上一ｄ援交的題目，娛樂圈的大小事情，搵人笨的投訴等等，都值得回味一番 

大佬的驗身報告話佢膽固醇高咗少少喎，尿酸又係高咗少少，不過後生仔做吓運動，食嘢節制一ｄ，再加上佢第日可以響會所做吓運動，應該好快就 fit 晒 ga la 

都唔知點解有ｄ人成日咁鍾意反對我的決定，攪到大家唔開心先高興，其實之前都已經解釋過的一ｄ事情又要舊事重提，仲要咩都要理，咩都要管，仲要管埋ｄ唔關佢的事情，都好反感呀 

尋日上午診所超忙，下午就都幾好，可以有得休息吓之餘，營業額都過得去，唔會悶親 

宜家好多豪宅都有會所，一座有 6 層高的會所更是令人興奮，裡面有的設施都係應有盡有，連籃球場同羽毛球場都有真係有ｄ意外，宜家的人真係好識享受生活，有機會都要一試豪宅的會所同服務先得 

今個星期好似過得特別快，返埋聽日又可以休息一吓，行吓街買吓嘢咁，其實本人鍾意一ｄ平平淡淡的生活，唔鍾意太刺激，太多活動反而令我唔係好自然，可能係性格關係啦，比較文靜一點，有空餘時間都想留響屋企，所以屋企一定要有溫暖的感覺呀 

今日一朝早有好多病人黎睇我呀，一個接住一個，攪到都冇咩時間寫日記，不過點都好，今個月都幾舒服呀，唔會忙得好辛苦，亦都唔會太得閑，真係一個字 ... "正" 

囡囡尋晚同今日都有少少肚痛呀，希望佢冇咩事啦 

喉嚨仍然有一ｄ微痛，不過又唔係好嚴重喎，可能係食緊 Ponstan 250mg 控制住佢啦，都冇其他嘢唔舒服喇，我諗一兩日之內應該都冇事 ga la 

尋日有個可疑男人走入黎話係政府某部門人士，要一ｄ資料做統計，雖然佢都有出示證件，不過我都係唔放心，其實我最驚佢係一個賊，想知道診所有咩人，準備黎打刧，所以依排我都唔會帶信用卡同提款卡響身，費事一陣俾人打刧攞晒我ｄ錢呀 

我想買的睡衣同月票都仲未買喎，一來時間問題啦，二來唔知點解唔係好意思囉，想當年我一個人住大埔果時，連廁紙都唔敢落街買，男人老狗拎住一大條廁紙通街行都幾核突吓囉，所以有時就由父親大人黎探我果時幫我買埋喇，當然宜家冇咁傻的諗法啦，做人大膽咗好多，冇以前咁怕醜囉 

囡囡生活如常，工作仍然忙碌，希望佢可以習慣啦 ~~ 

今日喉嚨已經冇咩事喇，可能係食緊消炎藥的原因啦，尋日真係好攰，今日真係好番好多，再加上尋晚都幾早瞓，應該今次都唔會病掛 ?! 

依幾日都有好多嘢要買呀，要買月票，買一佰蚊三套的睡衣，仲有要幫囡囡攞隻豬豬俾佢，隻豬豬好靚 ga，係藥廠送既，仲可以用黎儲錢添，真係一物二用呀 

下個月有好多好嘢食呀，應該會有兩餐自助餐 + BBQ，希望到時唔會食到唔舒服啦 

尋日 Eric 同安仔黎渡假屋一遊，不過佢地唔係留咗好耐 ja，囡囡之後都有上黎一齊傾吓計，希望冇悶親佢啦，再加上渡假屋未有遊戲供玩樂之用，遲ｄ真係要買部遊戲機上去玩先得

之後同 Eric 食晚飯，囡囡都有黎 ga，今次係我請客，下次我去佢新屋參觀就要佢請我食嘢 ga la 

母親大人的背痛好似好咗一ｄ喇，而我今日好似特別攰，喉嚨都有少少唔自然，唔通又係 ...

母親大人尋晚開始又有背痛呀，屋企的藥物又o岩o岩用晒，今朝早叫姑娘攞咗ｄ平安藥，當然攞埋囡囡想要的肚痛藥黎看門口啦，唔怕一萬至怕萬一，有平安藥響屋企係放心ｄ既 

尋日有公司(其實係藥廠) 攪的 lunch meeting，主題係 metabolic syndrome / obesity，所以藥廠 order 的食物都真係好清淡，勁多蔬菜同菇類囉，我覺得清淡係一個藉口，其實藥廠可能冇咩錢，所以連食物質素都要慳番ｄ，再者ｄ病人冇咩錢，又點會肯花好多錢去食藥減肥吖 ?!  所以宜家藥廠ｄ生意都幾難做呀 ~~ 

尋晚囡囡去旺角同舊同學一齊食晚飯，我咁o岩又想出去旺角行吓街，不過我地最終都冇響旺角相遇呀，一來佢又要同其他同學仔傾計，二來我又未食晚飯，跟住又要返屋企早ｄ休息，因為今日都要繼續開工，不過唔緊要，因為囡囡聽日會入黎搵我，到時仲有 Eric +/- 另一位中學同學一齊食晚飯呀 

尋日同 Kelvin 傾咗好耐，得知好多不為人所知的醫生內幕，今次冇買 / 轉換任何基金，同時我亦都要請佢食一餐飯，希望將來繼續合作啦．．．佢都有叫我買其他保險 ga，不過我手頭上已經有一份喇，唯有下次真係有需要先幫佢買啦 

從其他姑娘口中得知 Mxxdy 姑娘響附近搵到份工喇，希望佢可以努力工作啦 

尋晚母親大人整咗海鮮餐俾我地食呀，有蠔有鮑魚，不過食埋依次都唔好再食海鮮住喇，因為大陸果邊有大量垃圾漂緊黎后海灣，兩日後就會到 ga la，之後的海鮮唔多唔少一定會受影響，所以之後不吃為妙囉  　

囡囡今晚約咗人去旺角食晚飯，仲要話今晚可能唔得閑打俾我喎，咁唯有叫佢玩得開心ｄ啦，閑時想起我同埋識得返屋企就得喇 

今日天雨濕濕，又好眼瞓，最慘今日下午仲要冇得返屋企休息一吓，事關約咗傾基金一事，其實轉唔轉份基金都冇咩所謂，因為宜家股市經濟差，買咩都唔得 ga la 

尋日同囡囡講我幫人一事，囡囡話我叻喎，不過我就唔係咁覺得，可能我做咗的嘢其實唔多，只係當時極力游說佢入醫院檢查清楚，同埋即時寫咗一封轉介信俾佢，再加上我又唔係幫佢做化療的醫生，我淨係比較詳細咁解釋佢老婆的病情俾佢聽，不過點都好，病人終於可以康復就真係好開心呀 

BoBo 狗仔星期日撞親個頭仔，星期一就起咗個瘤仔，尋日母親大人幫佢捽吓啦，點知跟住就流血喇，宜家最擔心的係果個究竟係咩瘤，如果淨係撞親的瘤又點會流咁多血呢 ?  雖然宜家流血的情況已經受到控制，不過全家人都仲係好擔心佢呀，希望狗仔快ｄ好番啦 

今個星期好忙呀，聽日約咗 agent 傾吓ｄ投資組合，同埋打聽一吓業內行情，後日就有公司的 lunch meeting，其實都唔係好想去 ga，因為響屋企休息吓仲開心囉 

我大佬俾咗張單我喇，係佢想要的最新 PS3 遊戲 Street Fighter 同遊戲手掣作為佢今年的生日禮物，原來一ｄ都唔平喎，加起上黎要成千蚊，都有少少肉赤呀 

囡囡做嘢的地方有一個有問題的師奶，佢有可能有 absence seizure 喎，因為無啦啦佢會靜止晒做緊的嘢，好似呆咗咁，我未見過佢所以唔知係咩事啦，不過囡囡的同事都有一個係醫生黎 ga，佢話果個師奶應該唔係有精神病 (Psychiatry)，而係神經病 (Neurology)，總之咩都好啦，佢嚇到囡囡好驚囉 

尋晚睇咗高清台重播的 "包青天"，真係好好睇呀，宜家做緊的係 "狸貓換太子"，真係好想睇包公點樣可以令個太監總管乖乖咁認罪，哈哈 ~~

o岩o岩有個病人同佢老公入黎話要多謝我救返佢老婆，仲俾咗 $100 我作為利是添，我已經話唔好 ga la，佢都仍然堅持要放低張 $100 紙先肯離去，咁我唯有將果張 $100 紙貼響佢排板入面，等佢下次睇醫生可以平 $100 啦