美市大跌，美國國會否決救市方案，尋晚跌咗差唔多成八百點，今朝港股必定狂瀉千幾點，宜家真係有貨就要沽，冇貨就要睇定ｄ先好買，今年股市都係冇運行 ga la，踏踏實實咁做嘢仲好啦 

尋日送咗張餐枱黎喇，父母親大人都話幾好喎，不過父親大人都係驚佢唔夠穩，拉多兩拉就會爛咁話，不過我覺得用多幾年之後，爛咗咪買過張囉，又唔係好貴 

尋日發現原來元朗有一條裝修街，有好多又平又靚的家居設計用品賣，聽日有時間去一去又得，同囡囡食飯又得，響屋企 hea 吓又得，得咗 ... 

囡囡忙住揀日子影碩士畢業相，又忙住搵毛毛畢業公仔，等我放假果日同佢一齊搵一齊揀先得，仲要諗定幾時申請放假，如果唔係囡囡就會好失望 ga la 

嘩 ~~ 今朝睇報紙，話連好出名的朱古力豆豆 M&X 都有三聚氰胺，食咗會容易有腎石，雖然我唔係咁鍾意食朱古力姐，不過有好多小朋友鍾意食呀，總之今次ｄ小朋友真係大大鑊，早ｄ驗清楚先可以放心 

囡囡尋日搭車黎搵我，打俾我話到咗的時候，我已經完成晒手頭上的嘢，仲同母親大人響超市買完嘢出黎，一見到囡囡，嘩 ~~ 眼前一亮，又新又靚的上衣波點衫，加上粉紅色的白波點袋同埋一對好 sharp 好搶眼的瑩光黃色鞋，都俾我有一種好有 style 的感覺 

今日會有餐枱送到，我同囡囡揀 ga，一定係好靚啦，不過送黎果時一定要 check 清楚，驚佢ｄ玻璃有花痕，又要遙吓佢，睇吓有冇唔穩陣的情況，不過全部都係靠母親大人一手包辦，因為我地個個都要返工，希望一切順利啦 

尋日睇過個電視櫃同大衣櫃，我非常滿意呀，仲將個 40 吋大電視放上去睇吓先，睇太空人返落地球的情況，尋日仲攪掂埋白色圍新前面的裝修，又打掃一番，拖吓個地，同日亦都睇埋個細房吊櫃同露台的掛衫金屬棍，係我的父親大人一手包辦 ga，佢整嘢真係好叻，如果我有佢一半就好喇，哈哈．．．總之我就係好滿意啦 

左邊的智慧齒終於都出咗大半，不過佢唔係一柱擎天囉，而係打橫瞓咗覺，問題就響依度喇，因為佢唔平滑的表面向住隻大臼齒，加上仲有少少空位響佢地之間，每次食完嘢一定有食物殘留起個空位入面，牙刷又刷唔到，牙線又入唔到，終於俾我自製咗一個 L 型的儀器幫我將殘留的食物取走，不過依個都係暫時的辦法，因為我發現大臼齒的底部有少少侵蝕，可能要補牙，遲ｄ仲可能要將隻智慧齒拔咗去，不過要放大假果時先處理佢喇，宜家暫時又冇咩事，繼續 keep observe 啦 

其實囡囡都已經做得好好喇，見佢都冇咩發脾氣，都有好大的改善，希望佢之後都可以咁啦

尋日一黎就有四個小朋友想做腎石檢查喎，毒奶粉真係害咗唔少人，無良商人真係好討厭，為咗賺錢無所不用其極，我會繼續支持依ｄ受咗傷害的小朋友，為佢地檢查清楚，因為腎石真係好痛 ga，咁細個的小朋友唔應該受依種痛苦，佢地真係好可憐呀 

今日診所突然間冇咗冷氣，一返到診所真係又熱又焗，攪師傅睇過之後話冷氣塞咗，要搵冷氣技工處理喎，打俾寫字樓的林生，佢話會盡快搵人黎處理喎，好在我診所有一把風扇仔，上咗黎新舖都未用過，宜家真係大派用場，今日都冇打呔同埋要整高個衫領黎睇症，希望咁的日子可以快ｄ完結啦 

囡囡尋晚同我傾返我地相識的經過，原來佢第一次同我出街果日本身係約咗令一個囝囝呀，不過唔知點解佢推咗人地，變成見我喎，可能佢知道我先係佢的好囝囝啦，依ｄ係女人的直覺咁話喎，女人的直覺有時都係幾準 ge．．．

今日俾我仲見到一隻死咗的細曱甴響診所，咁o岩診所附近有人賣一種名為 "曱甴七日飽" 同 "曱甴一日清" 的大陸製產品，據知情人士講都好有效喎，我估計應該係一ｄ曱甴粉，而且毒性強烈，都想買少少黎試吓，因為前日所見的幾十隻曱甴大軍令我非常震驚，真係估唔到診所原來有咁鬼多曱甴，不過問題係買 "一日清" 定係 "七日飽" 好ｄ呢 ?!  我就緊係想一日清啦，曱甴就緊係想七日都飽啦，買晒兩種一齊用又好唔好呢 ?!  會唔會影響人的身體呢 ??  都係等我一陣問一問仲好 

大衣櫃同電視櫃將會響今個星期六送黎，餐枱就會響下個星期一送黎，而梳化就響下個星期日就有喇，不過要全屋大掃除先，因為裝修完之後有好大塵同垃圾，而十月亦都攞咗一日假期休息一吓，陪吓囡囡又好，攪吓間屋又好，定係瞓吓覺都好啦，總之假期唔多的我一定要小心佈署所有假期，遲ｄ放大假可以返大陸睇嘢同買嘢，最想睇的係燈飾，因為果邊比香港依邊真係平好多，又可以慳返一筆 

仲有幾日又過埋九月喇，十月將到，應該開始會愈黎愈忙，忙到去十二月，所以我的大假都會響依幾個月放埋去，事實上係唔放唔得，因為合約一完而又未放晒ｄ假的話，所有假期都會冇晒，所以我仲有幾多日假期都入晒落電腦，清清楚楚就最好啦 

囡囡心情同事業皆得意，佢擔心的只係前途問題姐，總之宜家唔好諗咁多，開開心心咁過生活仲好啦，其他嘢之後先諗啦 

依幾日母親大人都有少少唔舒服，背痛加肚痛，幫佢做過檢查，檢過小便，又冇咩嘢，如果再痛可能要寫紙俾佢做多ｄ檢查喇，因為始終佢做過手術，至少都做吓 AXR or USG 先可以令我地放心，加上佢有保險 cover，一元都唔駛俾 

囡囡同我今日都濕晒身，因為外面好大風大雨，囡囡要返番屋企換衫添，不過星期日一定會好天呀，可以同囡囡見面 

今日黃昏時份可能會有八號風球喎，不過今次個風行得好快，就算掛都唔會掛好耐囉，我諗我今日可以提早收工呀，早d 返到屋企 hea 吓都好 

今朝早又發現有四隻死咗的 BB 曱甴響我的附近，BB 的意思係因為佢地真係好細，長度可能真係得 5 mm 的 size，雖然得咁細，我都係唔敢同佢有任何直接的接觸囉，好彩暫時一切都受到控制，如果唔係我就一定會用必殺技 ga la 

囡囡尋日同朋友仔食晚飯，收到一份畢業禮物，係一個藍色波點袋喎，之前佢又有一對好靚的藍色波點鞋，佢真係好鍾意波點 ga，我就快叫佢做波點小姐喇，哈哈，不過千期唔好要我著埋ｄ咩情侶裝就得喇，因為男人老狗著波點衫真係唔好睇囉 

今日真係好多人黎睇醫生呀，做到冇停手 ~~ 

尋日去沙田行街，一見囡囡佢已經俾咗份禮物我喇，係 Mont Blanc 的禮物，真係多謝晒呀，因為我真係好需要依份禮物呀，除咗禮物之外，囡囡仲請我食晚飯添，去咗"和X" 到食，兩個人有著數，50% off 呀，好多嘢食，好好味，真係好開心呀 

尋晚食咗最鍾意的牛肉火鍋之餘，仲有好好味的鷄串燒同吊燒魷魚呀，日本炒烏東都好好味，飲品又正，我唔係賣廣告 ga，人地真係整得好好味呀嘛，值得一試再試 

股市回升成千幾點，減持咗一ｄ貨，損失唔係好多，因為我對後市唔係咁有信心，依個時候都係輸少當贏呀 

返埋今日就可以放返一日假喇，不過話就話放假姐，又要到沙田俾人悶一餐，之後同囡囡食晚飯，囡囡話請我食嘢喎，咁好 ?!  順便行吓街，睇吓人地ｄ設計囉，再睇吓有咩好買，事實上都有一段時間冇行沙田個大商場喇，唔知有冇一ｄ唔同咗的地方呢 ?! 

今日好似係山頂之友的聚會，可惜我逢一至六都冇緣出席，唯有下次有機會先再現真身啦 

囡囡尋晚同一個港大的師妹食飯，講起佢有一對好靚好白的長腿，宜家仲未有拖拍，佢響女士們當中都算高，不過又唔係太高 ge，佢好想拍拖喎，不過又唔想去一ｄ "we we wet wet" 的朋友聚會喎，咁又係，落得 bar 去得遊船會的人都唔會太適合一ｄ比較靜的人，我就係一個例子喇，我都唔太鍾意應酬，又煙又酒的地方就真係唔好攪我，佢都要慢慢搵喇，因為真係好的男仔通常都唔會響 bar 響 K 的地方搵到 ga 

今日決定如果股市大升，要減持一ｄ手上的股票，日日睇住個咁的市真係冇咩心情，輸少少走咗貨，再跌到勁低果時先買返仲有化算，睇睇一陣開市的情況係點先決定啦 

今日返到診所又有兩隻死咗的細曱甴呀，我都話ｄ曱甴藥係好有效啦，總之唔好俾ｄ細曱甴快高長大變成大曱甴就得喇，宜家終於放心晒喇 

今朝起身又有少少頭痛，唔會係作病嘛 ?!  食粒藥睇吓點先，應該好快冇事呀