今晚約咗囡囡食晚飯，事關我地都有成差唔多兩個星期冇見面喇，佢會入黎搵我呀，原先諗住我出去旺角 ge，不過囡囡話唔想等得太耐，所以就入黎喇，我仲同佢講如果佢入黎，我會有張 allowance form 俾佢填添，原來佢一直都唔知有依張 form，仲要話想 claim 返之前果ｄ，哈哈，笑死我喇 

終於對白色圍新的設計有咗最終的定案，得到屋企人的全場共識，咁我就放心喇，因為日思夜想的決定終於都冇白費，值得慶祝 

囡囡的妹妹今年係會考生，希望佢都有好的成績啦，其實囡囡可以教佢的時間唔多，又要做嘢，又要讀書，同埋有ｄ嘢真係好難教得到，例如自己識一樣嘢，但係要講到人地又明白的話，真係幾難 ga，教的都係教一ｄ考試的竅門，最重要都係靠自己，努力ｄ，咁就一定有ｄ好的成績喇 

今日心情唔錯，可能係因為有好消息的關係啦，有咩好消息 ?!  咪就係囡囡碩士畢業喇 ~~ 辛苦咗咁耐，終於有好的成果，真係值得恭喜呀，不過千期唔好咁易滿足喎，考埋個博士啦，咁就可以同我有相同的名銜喇，哈哈，講笑 ja，其實都知讀書會有好大的壓力呀，如果太辛苦咪唔好再讀上去囉，要識得享受人生先得 ga 

另一ｄ好消息就當然係同投資有少少關係啦，獲利咗少少錢，希望可以用黎裝修渡假屋之用，咁我就唔駛咁吃力喇 

尋日有一名少女被大樹壓死，佢姐姐同父親都係醫生，佢姐姐同我都做過同事，果時響瑪麗醫院外科部一齊做醫生，事情就是這樣的，原本一件以為同自己毫無關係的人和事，原來可能都有認識的人牽涉在內，往往就有好多巧合，人生真係有好多可能性 !! 

囡囡今日上午會完成碩士畢業試，希望佢一切順順利利啦 ~~

尋日上咗渡假屋到睇傢俬，一切都好好，仲同父親大人一齊研究好白色圍新後面的裝修添，諗起都好興奮呀，要訂多兩塊玻璃做裝飾板，個設計已經參考咗好多好多設計師的意見，希望今次的裝修可以令渡假屋有豪宅的氣派之餘，又可以有我的風格啦 

星期六原本有大房的床送黎，不過由於其他嘢都未攪掂，所以一陣要打去屯門的傢俬舖叫佢下個星期六先送黎，咁我地就可以唔駛咁趕喇 

診所的清潔叔叔同我地講，診所有好多曱甴仔喎，可能係爆咗粒曱甴蛋蛋咁話，宜家要諗方法去處理喎，可以的選擇有曱甴水，曱甴粉同曱甴屋，咁唯有一切都聽從清潔叔叔的意見啦，雖然我對曱甴的結構都知少少，不過由於佢外型可怕，我都十分害怕見到曱甴 ga 

訂咗的傢俬同床褥將會響今日同星期六送黎，好緊張呀，因為係訂造的關係，size 同高度都係一定好 fit，不過父親大人話唔好咁高興住，因為度尺依家嘢唔係咁準喎，所以到時仲可能要執一執佢咁話，今晚放咗工可能會去渡假屋一遊，睇一睇細房張床同衣櫃咁囉，希望都合乎我地的心水啦 

囡囡聽日就係碩士畢業 present 喇，佢話好緊張喎，不過我睇佢都準備充足，溫好晒書，又練好晒 present，應該冇問題呀，最緊要今晚咩都唔好諗，早ｄ瞓覺，聽日淡定ｄ，show 個好 off 俾ｄ examiner 睇，咁聽日之後佢就係一個碩士生喇，加油呀 ~~ 

今個星期六攞咗假喇，不過唔知批唔批喎，諗住一係同囡囡去慶祝，又或者去渡假屋整傢俬，點都好啦，放一日假點都係爽 ga la，如果有多ｄ 年假就好喇，不過我現時都係要錢唔要假好ｄ，後生仔 ar ma，宜家唔辛苦ｄ第日邊有好的生活喎 ．．．

依幾日真係開始咗喉嚨痛喎，仲要有一點白點添，食消炎藥之餘，仲要食埋抗生素呀，所以一到今日，喉嚨明顯有好大的改善，不過要食足一個療程囉，今日仍然都要食 ．．．

尋日響屋企 hea 完一輪，再去我大佬的新屋睇電視，美國大戰西班牙籃球決賽，真係好刺激呀，睇到唔想走，再之後去咗整裝修，將兩個木箱同玻璃安裝好，而囡囡就話要溫書，想多留家中，又唔想我咁辛苦走黎走去，所以尋日我地都冇見面呀，等佢星期三攪掂晒ｄ嘢先一齊去玩啦 

星期六想請一日假休息，一陣 fax 張請假紙俾寫字樓先 ．．．

尋日打九號風球，放咗一日假，不過都冇咩地方去呀，因為今次個風都幾勁，淨係睇完奧運之後，落咗街食個午餐，跟住就返番屋企休息同繼續睇奧運乒乓波準決賽，真係好好睇同好刺激呀，攪到我都好想打番波，不過宜家已經唔係學生年代喇，打波真係要有時間先可以．．．睇咗一陣電視之後，睡魔急 call，冇計啦，一瞓就瞓咗三個鐘，真係爽到爆 

姑娘們響診所愈黎愈放肆，攪到我都要出聲，希望大家要自律啦，如果唔係我真係好難做 ga 

尋日開始喉嚨有ｄ痛，食咗ｄ消炎藥，情況好少少啦，希望唔好真係病咗啦，因為星期日要出街玩，如果有病就唔出 ga la，費事傳染到俾人啦 

一號風球已經由尋日掛起，今日下午會改發三號風球，而聽日的上午應該會係最接近香港，咁即係準備可以上渡假屋玩返個飽啦，不過我估計聽日的下午要返工囉，因為睇返個路線圖之後，發現個風聽日上午已經登陸咗，咁即係話風勢會減弱啦，可以放全日假的可能真係微乎其微，現實ｄ啦，唔好咁多狂想喇 ~~

囡囡仍然坐立不安，擔心考試同 present，又話好辛苦，又話唔知可唔可以捱得過，其實如果俾我響一個知道 passing rate 有 100% 的考試中，我的壓力係近乎零，最多咪樣衰少少俾 professor 話兩句，反而對我黎講考試的壓力真係唔大喎，我覺得工作的壓力仲大啦，尤其響醫院裡面，成日失眠，情緒又好低落；總而言之，放鬆吓個人，唔好成日諗個 present，而自己就要勤力ｄ讀熟ｄ書，睇熟ｄ講詞，咁就算失敗咗，都已經盡咗全力，何罪之有呢 ? 

依排又開始讀吓書，因為響診所空閑的時間多咗，睇奧運亦係我娛樂之一，不過隨住奧運就快完結，我的心靈又再度陷入危機，希望過多一兩個月之後會好ｄ啦 

DFM 出咗結果喇，當然係一個好開心的成績啦，我的診所外面可以加多一個名銜喇，其實自己本身最想有一個皮膚科同埋兒科的名銜，遲ｄ一定要報黎讀先得，總之只要人工可以加加加，考咩同讀咩都冇所謂呀 

搵錢最緊要頭依幾年，因為本人本身好窮，所以宜家一有機會就要搵多ｄ錢，人生好景的時間其實唔係好多，亦都好難預測，依個亦都係我慳錢的原因之一 

囡囡話心情好緊張喎，驚有好多嘢唔識，其實只要放鬆自己，答問題的時候，6 成係自己實力，2 成係運氣，其餘 2 成係妳的 EQ / 情緒，如果太過緊張，就算妳好有實力，表現都一定唔會好，所以千萬唔好臨近考試果時成日諗住考試，諗吓其他嘢仲好啦，咁妳就一定會成功 ga la 

話咁快今日已經係星期二喇，每天的工作量不多，都幾寫意呀，如果每日可以多返少少人仲好，因為咁就可以有得分，宜家就多咗時間上網，溫書，又或者睇電視，唔知咁的生活可以維持幾耐呢 ?!  人工出年會有幾多呢 ?!  真係好希望有一個答案 

尋日同劉醫生食飯，食午餐都食咗 $9x，我問劉醫生係唔係好豪，佢話唔係好豪姐 ... 哈哈 ... 原來我真係一個幾慳的人    不過點都好，尋日果餐真係好好食，因為加咗錢要特飲同湯，$9x 係值得呀 !! 

囡囡一朝早話有ｄ頭暈，可能係天氣太熱，再加上佢依排又咁鬼緊張，瞓又瞓得唔好，真係要小心身體呀，抵抗力一定要強，如果唔係月尾點可以 present 得好呀 

尋日終於好乖咁去咗沙田上堂，仲要好乖好留心咁上晒兩堂，第三堂都係例牌唔上囉，真係上堂都上到有ｄ攰，最慘的就係仲要上多一年先可以完成，到時先睇吓有冇需要報讀其他課程啦 

上完堂就去搵囡囡一齊睇床褥，囡囡話我揀果張床褥太硬喎，不過我覺得都 ok 喎，最終都係達唔到共識，不過我都已經盡晒力 ga la，但係囡囡都好似唔係咁鍾意呀 

訂完床褥，就去咗行街街喇，囡囡都係冇咩笑容，左氹右氹都係得少少微笑，佢可能壓力太大掛，事關宜家距離佢月尾的畢業 present 都好接近，我會盡量響依段時間支持佢，希望佢可以開開心心咁渡過依個人生之中的一個難關啦 

行到攰，去咗珊瑚X 食嘢，原本上網睇完之後以為唔好食，不過原來都幾好食喎，服務都一流，可以值得推介，我同囡囡坐埋響一邊，咁會方便ｄ，氹吓氹吓，囡囡又笑返喇，攪到我都好開心 

食完嘢之後，行咗一陣海旁，吹吓風咁啦，有一種休閑的感覺，都幾寫意 ga 

今日約咗劉醫生一齊食飯，順便俾返ｄ notes 佢，我估今日都係食 Pizza Hxx 為主 ga la，不過唔食 Pizza 而係食意粉，事關我近排的額頭多咗好多豆豆，可能係一邊睇奧運一邊食炸嘢所致，宜家要少食煎炸嘢喇，Pizza 好熱氣 ge，都係少食為妙