今日著咗套新衫返工，勁好著，勁舒服，果然係一分錢一分貨，原價要成四千元ｇａ，不過宜家有特價，哈哈．．．我格咗好耐價 ga la，精打細算，希望買到ｄ又平又好的嘢囉 

尋日真係好攰呀，上完堂仲要返工的感覺真係唔好受，不過冇計啦，趁後生學多ｄ嘢，攞多幾個 quali，第時老咗都唔駛愁．．．返到診所都有好多症等住我黎睇，最後全日收入都幾好喎，值得慶祝，今個月的人工係自我做嘢以來最高的，不過我從來唔會自滿，明年人工希望亦有個新突破，其實老闆娘係會睇個營業額黎加人工ｇａ，好似上年咁，我有超過一半的月份有得分，即係做得好啦，原本冇加得咁多ｇａ，不過佢睇番會計條數之後，即刻加到我希望的要求，雖然話分花紅的額被提高咗，不過診金亦相應增加，即係打番個和啦 

尋日去上堂之前，去咗沙田的馬莎睇皮鞋，因為囡囡話送俾我作為我今年的生日禮物，真係好喇，有ｄ真係好型好好睇ｇａ，價錢都唔貴，星期日可以同囡囡去銅鑼灣的時代廣場睇睇，價錢都好合理ｇａ，值得一試 

今日要去沙田上堂，因為今日的題目係皮膚的疾病，要一邊上堂，一邊睇 slide，淨係睇 notes 就真係唔得 ga la，不過咁樣去一去就冇咗幾佰元，今日依堂就真係貴喇 

今日心情都唔錯，不過諗起尋日一ｄ唔開心嘢就真係有少少情緒低落，咩事就唔好講喇，都係工作上同病人的麻煩嘢，其實醫生真係一門幾難做的行業，人工又唔係特別高，但係受氣又特別多，不過都冇計啦，做醫生已經係我的職業，唔通轉行咩 ?! 

今個月的花紅數目都好理想，其實再多再少都已經唔係太上心喇，可能已經到咗我心目中的價位啦，其實咁仲好，唔駛俾自己太大壓力，做嘢輕鬆了不少 

今日開始倒數今個月的最後三日，辛苦埋依三日，我諗都要好好休息吓，跟住又要諗諗三月尾要交的果份功課，依份功課已經係第四份 ga la，即係再做多份就可以完成個 DFM course，其實時間同精神的付出，遠遠比交咗的幾萬元為多，不過都係為將來舖路，希望第日唔駛工作時間咁長，一個星期有固定的兩日假，仲有年假大假同花紅雙糧，咁就最好喇 

尋日我放工之後第一次幫狗仔 BoBo 沖涼，因為佢太 dirty 喇，睇唔過眼，不過沖沖吓先知原來父親大人已經響下午幫佢沖咗，哈哈．．．正所謂一係冇涼沖，一沖就沖兩次，狗仔狗仔，妳好可憐呀，不過妳亦好可愛呀 

囡囡做嘢好辛苦呀 ~~ 努力呀，血腥熊一家人都會支持妳呀 

尋晚放工之後約咗父親大人到銀座買嘢，攪到好夜先有飯食，不過買得心頭好，遲少少都唔緊要啦 

今日下午會出席一個醫學聚會，一來唔駛俾錢，二來又有書聽，三來可以早走唔睇症，不過換黎的就係下午冇得瞓覺，咁真係唔知好定壞喇 

囡囡上午都去酒店有個學術交流，不過佢依排都好忙呀，真係要小心身體，唔好生病呀 

婆婆響上星期六已經離開咗我地喇，心情當然有點兒不快，不過睇到佢響老人院的痛苦，離去又何嘗不是一個解脫呢 ?!  況且婆婆又已經成九十歲，真是不想看著她有多一點痛苦，再加上佢身體近依兩年又真係差咗不少，希望娑娑永遠都能夠安息啦 ...

尋日係星期日，即係我放假的日子，早上響屋企睇電視，中午同屋企人飲茶，順便攞埋我訂做好的褲子，不過由於褲子仍然太長，所以今日父母親大人要代我再攞去改做，不過今次唔知要唔要俾錢囉．．．

母親大人的康復情況理想，可能微創手術真係會好快好番囉，手術後第二日傷口已經唔再痛喇，希望佢再快一點康復，咁我就最安心喇 

尋日同囡囡出街玩，買咗一份名貴禮物俾佢，係一對鑽石耳環，價錢都好合理，希望佢可以好好用依對耳環，咁就好好喇；再加上我已經將豬仔水晶轉送咗俾囡囡，佢都話好靚好鍾意喎，咁就要對佢好ｄ，唔好整爛佢喇 

尋晚同囡囡去小X羊打邊爐，好好味呀，不過宜家好似貴咗少少，兩個人食咗八樣嘢，最後埋單要成四佰一十幾，哈哈．．．貴唔貴就見仁見智喇 

母親大人出咗院喇，佢好精神呀，微創手術又真係幾好喎，住三日院就可以出院，返到屋企個傷口仲一ｄ都唔痛添，值得推介 

今日個喉嚨好明顯係冇咁痛，又冇咩其他唔舒服添，應該係一ｄ少問題ｇｅ，希望快ｄ好番，可以同囡囡有個開心的星期天啦 

依幾日病人人數減少了，有ｄ唔開心，不過唔開心的日子唔會太耐，因為過咗依個月，有幾多病人都已經與我無關，事關就算之後有得分，數目都係相當少，我寧願少人ｄ，做得開心ｄ，咁就最好喇 

尋晚聽到婆婆一ｄ唔好的消息，令到我有ｄ擔心，希望佢冇事啦；再加上我要賣晒ｄ股票黎套現還番俾婆婆，因為讀書果時屋企人借咗佢少少錢囉，心情現在真係好矛盾；又再加上母親大人o岩o岩做完手術都未出院，希望全部人都可以健健康康就好喇   

今日個喉嚨又係有少少唔自然，點解會咁呢 ?!  真係冇時間，亦都唔想諗，食粒消炎藥先 

尋晚的春茗真係貴，貴就貴在我冇咗兩個鐘的睇症時間，其他月份當然冇所為啦，但係今個月係全年唯一，又或者係其中之一有得分的月份，亦是可以分得最多的一個月份，不過徧徧就響依個時候黎個春茗，做少好多生意，所以尋晚果餐都只係食得麻麻地開心 

晚宴其間，阿太突然現身於劉醫生的背後，問佢點呀．．．辛苦晒喇，原來阿太咁關心劉醫生ｇｅ，今次佢加人工有望喇，加多ｄ，請我地食多ｄ，間接我第日都可以加多ｄ，劉醫生，努力ｄ呀，唔好令我失望呀 

尋晚春茗其間得到咗一隻水晶熊仔，原本都好開心，不過被牙科姑娘攞咗，都諗住算啦，不過佢今日又將熊仔俾番我，佢話佢男朋友鬧佢，仲咩要咗人地ｄ嘢呀，人地又冇話俾妳等等，宜家物歸原主，我將會將熊仔轉贈俾囡囡，希望佢可以將水晶熊養大，遲ｄ將一隻大大水晶熊俾番我，咁我就好開心喇 

今日係母親大人入院的第一日，佢一定好緊張喇，因為佢自從生完我之後都未入過院ｇａ，希望佢今次一切順利，快ｄ返黎屋企啦 

今晚係公司春茗，有大搵獎呀，希望攞到現金獎啦，事關我錢包的現金愈黎愈少，又唔想響提款機攞錢喎，咁唯有響其他方面 "搵真銀" 啦，所以宜家股票，Part-time，"秘撈"等等都要做，遲ｄ幫埋人補習都要添呀，不過學生方面就緊係醫學生又或者學護妹妹啦，一個鐘三佰元，你都咪話唔好做呀 

聽日又要到沙田上堂，不過又係攞完 notes 即走，又或者叫劉醫生幫我攞埋都可以，因為要早ｄ返診所搏殺，正所謂分分鐘都係 ... 錢 

尋日都幾好生意喎，令到今日可以提早過額，真係值得高興 

B 記ｄ嘢係唔係好唔乾淨 ?!  點解成日都會食到人腸胃不舒服呢 ?  今次主角唔係我，係另有其人，不過依間嘢的食物都係一時時，有時會令人肚痾，有時又冇嘢喎，真係盡量都係少食為妙，除咗上堂果日啦 

愛心蛋蛋朱朱牌的朱古力真係好好食呀，不過因為胃仔唔舒服所以唔敢多食，遲ｄ冇事果時食番多少少啦，不過第二份愛心禮物就未用得住，因為天氣回暖，唯有等天氣再凍番先用啦 

母親大人今晚會入院做個小小地的手術，希望佢一切順利，盡快康復啦