  |
  
|
尋晚做完 locum 喇，由一點瞓到六點，不過冇屋企瞓得咁好囉，所以宜家都有ｄ攰呀，一陣下午返屋企再瞓多陣先得 
囡囡尋晚等我等到一點喎，不過果時我應該瞓緊覺 lu，今晚先慢慢再同佢傾心情啦．．．個個都問我仲咩咁搏做 locum 搵快錢喎，係唔係結婚呀 ?! 買車買樓 ?! 其實樣樣都有ｄ啦，錢有邊個話多呀 ?! 見自己好耐都未 call 過，如果想返番入醫院之前一定要練習吓 call，如果咁都頂唔順就只好維持現狀呀．．．而事實上 call 真係好辛苦，瞓得唔好就一定會頭痛頭漲，同埋瞓覺果時好 alert 囉，驚隨時有病人入黎睇醫生，個心跳得好快 ga 
尋日自己打咗支抗敏感針，因為ｄ風疹好似不停出緊黎囉，打完之後就真係好好多喇，不過有少少眼瞓同口乾囉，加上再繼續食抗敏感藥，今朝早ｄ風疹終於退晒喇，希望聽日做 locum 都唔好再出疹啦，因為真係好痕呀 ．．．想當年中三中四果時又試過出風疹，放咗學搭車出太子同父親大人睇醫生打針，睇一睇都成 $500，真係好貴，宜家做咗醫生喇，自己識醫自己，今次就係一個好好既證明啦
囡囡不停幫我睇酒店資料，想揀一間又平又高級既酒店擺酒，希望佢唔會太辛苦啦，我依排又係好忙囉，溫書加睇症都用咗大部份時間喇，聽日仲話做埋 locum，希望今晚都係早ｄ好好休息一吓，有囡囡幫我揀酒店就放心 ga la 
尋晚睇咗之前錄影咗既歌星賀台慶節目，好睇又唔話得，你話悶既又唔係，總之係可睇可不睇也罷啦 
今朝係入冬以來最凍既一朝，屋企尋日都有 18 度，今朝得果 16.5 度 ja，帶埋囡囡送俾我對冷手套先夠暖呀，希望囡囡唔會凍親啦
尋晚都唔知仲咩出晒 Urticaria，好痕呀，可能飲咗碗中藥湯出事，加上轉天氣身體會比較敏感，前一日都出咗兩粒，不過估唔到尋晚出到全身都係咁嚴重 ja ma，立即食咗兩粒藥，宜家就真係好好多喇
部電視整番好喇，整咗 $1150，全數有得同電器行 claim 番，如果真係要自己出錢就未必整 ga la，因為宜家 HD ready 既電視都只係賣 $2K-3K，維修費同買過部電視都差唔多，不過宜家一蚊都唔駛俾就冇所謂啦 
後日係我做夜診 locum 既日子，希望一切順順利利，最緊要有得瞓就得喇
屋企部電視機真係壞咗呀，開得著，不過冇畫面囉，影響就實有 ga la，不過對我就唔係好大囉，母親大人影響就大ｄ喇，希望可以早ｄ搵人黎整番好部電視啦
今朝天氣凍咗好多呀，要著番件冷背心先夠暖，返到診所就暖晒喇；咁凍既日子真係唔想跑步呀，依個禮拜都好似未跑過步，希望唔會咁快肥番晒啦 
囡囡尋晚考新娘化妝既試，一切順順利利，成功合格，仲有機會全班最高分添喎，真係值得慶祝，星期日就同佢去慶祝一吓，食吓好嘢，參觀吓結婚酒店就好喇
有ｄ擔心星期五做 locum 有冇時間瞓覺呢 ?! 冇得瞓好慘 ga，第二日又要返工，不過下午可以瞓番補數既，趁後生搵多兩個錢旁身都好，當響醫院做囉，醫院都要 call，都要冇得瞓 ga la，宜家又冇壓力咁做，加上做 locum 睇症同做日診睇症係有少少分別既，畢竟做 locum 醫生睇得再好都唔會有人搵番你，只要唔好開錯藥就得，輕鬆好多
