  |
  
|
尋晚又跑咗 13 圈喇，對腳好攰囉，今朝又要追車，要休息一吓先得．．．尋晚用新耳筒跑步，因為母親大人話唔好用喎，今次真係益咗我喇 
大佬今日會同父母親大人去婚展簽 contract，訂擺酒場地咁喎，而聽日我都同囡囡去睇婚展呀，希望有一ｄ好嘢睇啦．．．下午冇媽咪麵食，要食丁丁飯，不過一日半日就冇咩所謂啦 
尋日下午比較 hea，溫咗好多書，今日星期六都好難有時間溫書 ga la，夜晚又話要上渡假屋玩喇，餘下果幾個星期真係要努力讀書呀 
屯門急症室有個醫生要坐監喎，因為佢非禮一個 15 歲女病人，前途盡毀囉，佢個牌真係凍過水，希望佢會醒覺啦 
今日心情好好，可能同臨出糧有關掛 ?! 陳X健尋日搵過我過檔，不過條件真係一般，計埋車錢都只係同宜家差唔多，仲要食飯得一個鐘，都係唔走 ga la，除非加人工有我宜家 10-20% 啦，原來我宜家都幾幸福呀，都係暫時做住先啦 
尋日母親大人收到一份禮物，係跑步用既耳筒連 mp3，都真係又易用又方便喎，母親大人尋晚一邊跑步一邊用新機聽歌，都幾享受呀，星期日借黎用吓先得
電視機真係壞咗呀，一陣要打電話去叫人上黎收理，好彩有 5 年保養，宜家已經四年半喇，屋企宜家都係用上網電視盒睇住電視先 ja，總好過冇得睇既 
囡囡尋晚學新郎化妝，遲ｄ要搵我做 model 作為練習之用喎，我就冇所謂呀，希望佢學有所成就得喇 
尋日同囡囡去荃灣既 "如X酒店" 睇婚宴場地，價錢都平既，不過就唔靚囉，感覺不太好．．．同囡囡一齊已經揀好"好日" ga la，酒店就要多ｄ時間決定，不過其實都已經揀好埋 ga la，心理上只係想睇多一兩間先決定姐
尋晚同屋企人仲有囡囡去食海鮮餐，包括上湯龍蝦，蒜蓉粉絲蒸元貝，椒鹽賴尿蝦，龍躉兩味 (炒魚球 + 炆頭腩)，果皮蒸鮑魚，海鮮湯，招牌炒飯，粉絲煮菜心等等．．．真係好好味呀，依餐係我同大佬出錢請我地母親大人食 ga，預祝佢生日，希望一家人開開心心就得喇
除咗食之外，最開心就係揀海鮮呀，條龍躉好大條呀，仲要係響你面前生劏，其他海鮮都非常新鮮，真係食到嘴郁郁呀，有機會一定要黎再食過，全晚食咗 $1900，六個人食都真係好抵，如果冇叫龍蝦可以再平ｄ，食鼓油皇炒大蝦碌仲好啦，一樣咁好食 
尋晚美股急跌，前日買咗既貨有一半已經獲利，不過淨番果一半相信星期一都會變成蟹貨，心情當然唔好受啦，因為數量都唔少 ga，希望唔好繼續跌落去啦，因為我唔想愈踩愈深呀 
有時都覺得自己幾黑仔 ga，平時買少少佢就升多多，今次買多多佢就跌多多，唔通我真係唔適合玩股票 ?! 攪到尋晚都冇咩心情同囡囡傾揀酒店既嘢，希望囡囡唔會介意啦
尋日生意一般，俾我有時間讀吓書，咁就好喇，仲有一個月多ｄ就考試喇，希望可以勁過啦．．．今個月份糧一出就差唔多會冇晒喇，因為要還卡數，當中囡囡果對鑽石戒指係最多，而之後果兩個月都冇得儲錢，因為要交稅同 MPS，要真正有得儲錢就要等到明年一月出糧喇 
依幾日生意回穩番少少，俾我有時間響診所溫吓書，當然夜晚仍然有去跑步啦，仲跑咗 12 圈添，希望短時間內再減多 6 磅就好喇，我以後會小心飲食，唔會再俾自己肥落去 ga la 
囡囡宜家收集緊酒店資料，希望可以 book 定 2011 既婚宴場地，因為我地又唔係請好多人黎飲宴，而半島就有一個幾豪華既 ballroom，最多可以擺 10-12 圍，都唔平 ga，要超過一萬蚊一圍，不過我地都會再睇多幾間先決定響邊間酒店擺酒既，希望到時攪得好好睇睇啦
後日就同屋企人去食海鮮喇，餐單已經準備好晒 ga la，希望到時大家食個飽啦，非常期待星期日既來臨 ~~
